Misaka na sa 748,379 ka tawo o anaa sa 217,012 ka pamilya ang apektado sa magnitude 6.9 nga linog nga miigo sa Bogo City, Cebu niadtong Setyembre 30, base sa pinakabag-ong datos sa National Disaster Risk Reduction and Management Council (NDRRMC).
Sumala sa report, 1,324 ka pamilya o 5,170 ka tawo ang nagpabiling nagapuyo karon sa 19 ka evacuation centers sa rehiyon. Natala usab ang 79 ka namatay ug 559 ka samaran, bisan pa nga gipailawom pa sa beripikasyon ang maong mga numero.
Sukad sa pag-igo sa linog, adunay 12,704 ka aftershocks ang nasinatian sa rehiyon. Samtang, 134,224 ka mga balay ang napinsala diin 126,928 ang partialy nga nadaot, ug 7,296 ang hingpit nga nawaghanaw.
Sa bahin sa imprastruktura, gibanabana sa NDRRMC nga P6.76 milyon ang kantidad sa kadaot sa Region 7, lakip na ang 11 ka kalsada ug 25 ka tulay nga apektado. Sa maong ihap, 4 ka kalsada ug 11 ka tulay ang dili pa magamit hangtod karon.
Gipahibalo sab sa NDRRMC nga P464.78 milyon ang kantidad sa tabang nga naipanghatag sa mga apektadong pamilya, nga gilangkuban sa pagkaon, tubig, medisina, ug uban pang panginahanglan.
Padayon ang koordinasyon tali sa national ug local government aron mas mapaspasan ang pagtabang ug rehabilitasyon sa mga naapektuhan sa katalagman.
Photo Courtesy: Reuters
