Gipasabot sa Philippine Institute of Volcanology and Seismology (Phivolcs) ang nagkataas nga posibilidad sa pag-igo sa dakong linog o ang gitawag nga “The Big One” sa Metro Manila samtang nagkadool ang tuig 2058.
Sumala ni Phivolcs Director Teresito Bacolcol, bisan wala gyud matagna ang tukmang oras sa paglihok sa West Valley Fault, base sa mga datos ug kasaysayan, mas posible na kini nga molihok. Ang gitawag nga recurrence interval niini anaa sa 400 hangtod 600 ka tuig.
Ang kataposang dakong linog nga nasubay gikan sa West Valley Fault kay nahitabo pa niadtong tuig 1658. Tungod niini, posible nga mobalik ang linog sa dili pa o human na ang tuig 2058.
Kung kini mahitabo, gibanabana nga aduna kini magnitude 7.2 nga linog nga posible makaresulta sa grabe nga kadaut sa mga lugar sama sa Quezon City, Marikina, Pasig, Makati, Taguig, Muntinlupa, ug sa ubang kasikbit nga lalawigan.
Gipunting usab ni Director Bacolcol nga normal ra ang kanunay nga mga pag-uyog sa Pilipinas tungod kay adunay 180 ka aktibong fault segments ug unom ka active trenches sa tibuok nasud. Gibanabana nga mga 30 ka linog kada adlaw ang narehistro, apan kadaghanan niini dili mabati.
Tungod sa hulga sa posibleng kalamidad, gihangyo sa Phivolcs ang publiko nga gamiton ang website nga hazardhunter.ph aron mahibal-an kung aduna bay aktibong fault sa ilang lugar ug aron andam sa tanang panahon.
Photo courtesy to: MSN
