Girescue sa Department of Social Welfare and Development (DSWD), sa pakigtambayayong sa lokal nga kagamhanan ug kapulisan ang kinatibuk-ang 17 ka mga senior citizen ug PWD gikan sa Bukidnon Multi-Sectoral Services Foundation Incorporated, sa Maramag, Bukidnon, niaging Oktubre 11, 2025.
Naghimo gilayon sa maong rescue operation ang mga otoridad para masiguro ang kaluwasan sa mga nahisgutan human migawas nga walay saktong rehistrasyon ang maong foundation diin ang mga residente anaa sa kritikal ug delikado nga kahimtang.
Pipila sa mga kalapasan nga nakit-an mao ang hugaw nga mga banyo, mga lawak, kakuwang sa occupational safety standards, ug mga kondisyon nga makahatag og hulga sa panglawas, wala usab kini sa tukma nga sistema sa pagdumala sa kaso, sama sa tukma nga dokumentasyon sa mga residente, ug kakuwang sa mga kwalipikado nga tig-atiman o propesyonal nga tig-atiman.
Sa karon ang mga na-rescue temporaryo nga gibalhin sa DSWD ug pasilidad sa lokal nga kagamhanan diin sila makadawat sa mas maayong pagtagad ug pag-atiman
Kahinumduman nga ang DSWD ug ang lokal nga kagamhanan nibisita sa nasangpit nga pasilidad niadtong Pebrero ug Abril ning tuiga aron mahatagan kini og technical assistance aron makatuman sa registration ug licensing requirements, apan napakyas ang institusyon sa pagtuman.
Pinasikad sa Republic Act No. 10847, ang balaod nga nagdumala sa Social Welfare And Development Agencies (SWDAs) sa Pilipinas, ang tanan nga mga pasilidad kinahanglan nga marehistro ug lisensyado sa DSWD.
via: DSWD – Northern Mindanao
