Nangita og mga paagi ang Department of Health (DOH) aron hingpit nga mapaandar ang gitawag nga “ghost” o non-operational health center isip kabahin sa padayong paningkamot sa pagpalig-on sa nag-unang sistema sa pag-atiman sa panglawas sa nasud.
Sa usa ka pahayag niadtong Martes, giingon ni DOH Secretary Teodoro Herbosa nga kasamtangan silang nagpahigayon og audit sa mga health facility sa tibuok nasud aron mailhan ang mga natukod apan wala pa nagamit o wala nagamit tungod sa kakuwang sa mga kawani, kagamitan, o insaktong accreditation.
Matud ni Herbosa, 70 porsyento lamang sa 600-ka center nga gitukod ubos sa Health Facilities Enhancement Program ang kasamtangang naglihok.
Gipasabot niya, subay sa kasabutan sa DOH, ang mga local government unit (LGU) ang adunay responsibilidad sa pagkuha sa mga kawani nga mo-operar sa mga health center.
Apan, matud niya, mahimo kining i-tap tungod kay ang DOH adunay national health workforce system, sama sa programang Doctors to the Barrios (community doctors).
Dugang pa ni Herbosa, mahimong padaganon sa DOH ang mga health center pinaagi sa ilang mga personnel, basta duna’y kasabutan sa mga mayor nga dili kini mapadagan tungod sa personal services cap.
Usa pa sa mga opsyon, matud ni Herbosa, ang pagtinabangay sa DOH ug sa pribadong sektor aron mapaandar ang mga pasilidad nga natanggong.
Photo courtesy: Department of Health
