Magsugod na sa pagpatuman ang Land Transportation Office (LTO-9) sa “No Plate, No Travel Policy” alang sa tanang motorista sa Zamboanga Peninsula sugod Nobyembre 1, 2025.
Matod ni LTO 9 Assistant Regional Director Johan Macaumbos ang pagpatuman nakalatid sa gipagula nga memorandum LTO National Office may kalabutan sa hingpit nga pagdili sa paggamit sa mga temporary o improvised plates gumikan matapos na ang gihatag nga lugway sa pag-release sa mga plakang backlogs.
Gidasig ni ARD Macaumbos ang mga tag-iya sa sakyanan nga kuhaon na ang ilang plaka karong bulan sa Oktubre aron malikayan ang multa tungod kay base sa balaod dakpon ug pamultahon sa ₱5,000 pesos ang mga masakpan ubos sa Joint Administrative Order 2014-001.
Gawas pa niini, kuhaon usab ang improvised o temporary plate ug dili usab dawaton sa LTO ang renewal sa rehistro sa sakyanan nga walay tinuod nga plaka.
Apan, giklaro ni ARD Macaumbos nga sila may gihatag nga mga excemption nga makagamit sa improvised plate kung may official authorization gikan sa LTO office.
Sigun sa opisyal nga kining kamanduan nga “NO PLATE” “NO TRAVEL POLICY” gipatuman na sa LTO human gitaho nga wala nay backlog ang ahensiya sa pagpanghatag og original nga plaka.
