Nagpahigayon og rally kagahapong adlawa Oktubre 1, 2025, ang pipila ka mga lider sa tribu sa Kidapawan City sa buhatan sa National Commission on Indigenous People (NCIP) Provincial Office.
Sumala pa ni Datu Ronel Dali nga usa sa mga nanguna sa maong rally, nga ila na kining giplano nga himoon aron mapagawas ang ilang gibati sa nahitabo nga selection process sa Indigenous People Mandatory Representative kon IPMR sa Kidapawan City nga matod pa wala nisunod sa balaod.
Dugang pa, nga bias ang NCIP ug wala nasunod ni Regional Director Atty. Adolf Ryan Lantion ang ilang kasabutan, hinungdan nga nagkasinabot ang mga clan leaders nga magpahigayon sa maong kalihokan, aron mapaabot sa NCIP ang ilang singgit.
Saysay ni Datu Dali, nga aduna nay biases sa sinugdanan pa lamang sa selection process, tungod niadtong higayona adunay notice gikan sa NCIP Region nga dili magpahigayon og pagpili sa IPMR, apan luyo niini nagpadayon gihapon ang pagpili, kung asa tanang miyembro leaders sa ilang grupo wala nakaapil o nakabuto sa maong piniliay.
Gihingusgan sa grupo ni Datu Dali ang balaod ilawom sa Republic Act 8371 o Indigenous Peoples Rights Act (IPRA) of 1997, asa nagmando nga ang tanang Indigenous Cultural Communities (ICC) o Indigenous People (IP), adunay katungod sa pagpartisipar sa maong pagpili.
Panawagan niini sa NCIP, nga aksyonan o tutukan ang problema ug hatagan og pantay nga pagtagad ang tribu sa syudad sa Kidapawan.
