Misaka na sa napulo (10) ka insidente sa sunog ang narekord sa Iligan City sa miaging bulan sa Setyembre 2025, kini sumala sa Bureau of Fire Protection (BFP)-Iligan.
Gibutyag ni FO2 Renie Boy Maglangit, ang Chief sa Investigation Section sa BFP-Iligan, nga ang kasagarang hinungdan sa sunog mao ang mga electrical appliances nga wala ma-uplug , kandila o kalayo nga napasagdan, ug uban pang negligence related causes.
Sa usa ka eksklusibong pakighinabi sa Juander Radyo news team , mipadayag usab sa iyang mga pagpahimangno si FO2 Maglangit aron malikayan ang sunog sa syudad.
Gidugang pa ni Maglangit nga mahinungdanon nga i-check kanunay ang gasul, stove, ug kuryente ilabi na sa panahon sa pagluto ug sa dili pa mobiya sa balay. Gipanawagan usab ni Maglangit ang kooperasyon sa katawhan nga dili lang ang BFP ang adunay papel sa kaluwasan, kondili ang matag panimalay adunay katungdanan sa pagpugong sa sunog.
Usa na usab sa gihisgutan ni Maglangit ang nahitabong sunog sa bag-ohay lang sa Purok 5, Canaway, Barangay Tibanga, sa syudad sa Iligan diin napulo ka mga balay ang naugdaw tungod sa sunog. Usa kini sa serye sa sunog nga nahitabo sulod sa bulan sa Setyembre.
