Suportado sa grupo sa Mayors for Good Governance (M4GG), ang desisyon ni Baguio City Mayor Benjamin Magalong nga mo-resign isip miyembro sa Independent Commission for Infrastructure (ICI), nunot sa mga isyu nga naglambigit sa giingong ghost ug substandard nga mga proyekto.
Sumala sa grupo, ilang giila ang pasalig ni Magalong sa transparency ug accountability, ug nagtuo nga kini kabahin sa mas lapad nga pakigbisog alang sa maayong pagdumala.
Ang kagamhanan sa Quezon City, nipagawas usab ug pahayag sa ilang pagsalig kang Magalong isip convenor ug partner sa M4GG sa pagpauswag sa reporma sa gobyerno.
Kalabot niini, gipahibalo sa mga mayor ang ilang plano nga mohimo og kaugalingong imbestigasyon sa mga proyekto nga gitumong ni Magalong, ug misaad nga ipaambit ang resulta ngadto sa ICI aron makatabang sa mas lawom nga pagtuki.
Gitataw sa grupo, nga dili angay ibaliwala ang maong mga pasangil ilabi na nga adunay epekto kini sa pagsalig sa publiko sa mga proyekto sa gobyerno.
Nanawagan usab ang M4GG sa ubang lokal nga opisyal, nga magmabinantayon ug magtinabangay sa pagpalambo sa integridad sa serbisyo publiko.
Bisan pa sa pag-resign, si Magalong nagpabiling aktibong lider sa mga Mayors for Good Governance ug magpadayon sa pagpasiugda sa mga inisyatibo alang sa maayong pagdumala.
Photo Courtesy to:X
