Gipahibalo sa Netherlands niadtong Biyernes nga ibalik nila sa Indonesia ang koleksiyon nga gilangkuban sa kapin 28,000 ka fossils, lakip na ang mga tinawag nga “Java Man” bones ang unang nailhan nga fossils sa Homo erectus, nga maoy kaliwatan sa Homo sapiens.
Ang mga fossils nailhan isip Dubois Collection, nga ginganlan sa Dutch anthropologist nga si Eugene Dubois nga nakakuha niini sa Indonesia niadtong 1891, panahong sakop pa sa Netherlands ang maong nasud. Ang koleksiyon adunay dakong bili sa pagtuon sa ebolusyon sa tawo ug giila nga nagpakita sa koneksiyon tali sa mga unggoy ug tawo.
Sumala sa Dutch Independent Colonial Collections Committee, gikuha ang mga fossils sa panahon nga kolonisado pa ang Indonesia ug wala kini pagtugot gikan sa mga lokal. Giingon sa komite nga kini usa ka porma sa pagkadaugdaug o dili hustong pagbuhat batok sa mga katawhan. Tungod niini, girekomendar nila nga ang koleksiyon ibalik sa Indonesia aron mahatag ang hustisya.
Gipadayag usab sa Ministry of Culture sa Netherlands nga ang mga fossils adunay espiritwal ug ekonomikanhong kahulugan para sa mga lumulupyo sa panahong gikuha kini.
Kini na ang ika-unom nga higayon nga mibalik ang Netherlands og mga artifact gikan sa mga kanhi kolonya base sa rekomendasyon sa komite. Mas sayo karong tuiga, mibalik usab ang gobyerno sa Netherlands og 113 ka piraso sa Benin Bronzes ngadto sa Nigeria.
Photo courtesy to:The Guardian
