Natangtang sa semifinal round sa Jingshan Open si Filipina tennis star Alex Eala human siya mapildi ni Lulu Sun sa New Zealand niadtong Sabado sa hapon.
Nakauna si Eala sa unang set, 6-3, apan nakabalos si Sun sa sunod nga duha ka sets, 6-4 ug 6-2, aron makasulod sa finals sa WTA125 tournament. Sa championship round, makig-atbang si Sun kang Ma Yexin sa China nga mipildi usab ni Talia Gibson sa Australia, 4-6, 7-5, 7-5.
Si Eala, top seed sa kompetisyon, nagsugod og lig-on ug nakapahimulos sa mga double faults ni Sun aron makuha ang unang set. Apan sa ikaduhang set, bisan nakalabaw siya og 2-0, nakarekober si Sun ug nagpadayon hangtod nga napildi si Eala.
Sa ikatulong set, dali nga nakalabaw si Sun og 4-0 ug didto nawala ang momentum ni Eala. Nahuman ang duwa sa 2-0 head-to-head pabor kang Sun batok sa Filipina, lakip na ang ilang nakalabay nga engkuwentro sa qualifying round sa Wimbledon niadtong miaging tuig.
SOURCE: ABS CBN NETWORK
