Gipahigayon sa lungsod sa Magsaysay , Davao del Sur ang makahuluganon nga kalihokan nga gitawag Kasalan sa Tribu nga nagpasundayag sa tradisyonal nga kasal sa duha ka tribu ang B’laan ug Bagobo-Tagabawa.
Pinaagi sa mga sayaw, awit, ug simbolikong seremonya, gipakita sa matag tribu ang ilang kaugalingong estilo sa kasal, nga nagpamatuod sa kabilin ug espiritwal nga panaghiusa sa lumadnong komunidad.
Gitambongan ang maong kalihokan ni Municipal Mayor Engr. Arthur Davin, kauban ang mga sakop sa Sangguniang Bayan, Tribal Chieftain Bae Norma Rivera, Municipal IPMR Bae Norma Adlawan, ug mga IPMR gikan sa 22 ka barangay.
Gipasabot sa mga opisyal nga ang maong programa usa ka pagpahinumdum sa tanan sa pagrespeto ug pagpanalipod sa kultura sa mga lumad, ingon man sa pagpadayon sa mga inisyatibo nga nagpasigarbo sa kultura ug pagkatawo.
SOURCE: LGU MAGSAYSAY
