Mobalor sa P8.3 Million pesos ang illegal nga droga nga nakumpiska sa kapulisan sa Iligan sa ilang anti-illegal drugs operations gikan sa bulan sa Enero hangtod ning miaging adlaw Setyembre 25, 2025.
Sumala ni Police Maj. Zandrex Panolong, Spokesperson sa Iligan City Police Office, aduna nay 21 ka High Value Individual kun (HVI) nga ilang nadakpan. Gikonsidera nga High Value Individual ang usa ka suspetsado kung naghupot kini og 50 gramos nga druga o sobra pa.
Samtang apil sa gikonsidera sa kapulisan nga High Value Individual ang mga empleyado sa gobyerno, ug mga prominenteng tawo. Anaa na usab sa 402 ka Street-Level Individuals ang nadakpan o kadtong ubos sa 50 gramos ang dala nga droga.
Gipasabot ni PMAJ Panolong nga parehong gitutokan sa mga otoridad ang pagdakop sa HVI ug Street-Level Individuals. Matud pa nga ang pagdakop sa Street-Level Individuals makatabang sa pagtultol sa mga High Value Individuals.
Gitataw usab sa kapulisan nga taas ang proseso sa pagkuha sa impormasyon gikan sa Street-Level Individuals aron pakisayran kung kinsa ang ilang supplier, ingon man ang pagdakop ilabi na kay city to city, province to province, ug region to region ang operations sa High Value Individual.
Gipaklaro nga gikinahanglan matud pa og koordinasyon sa PDEA ug ubang police offices sa pagpahigayon sa mga dako nga operations.
