Gibutyag ni Atty. Raymond Fortun, nga daghan pang mga senador ang mahimong hinganlan sa umaabot nga mga adlaw, nga giingong nalambigit sa flood control projects sa Bulacan.
Matod ni Fortun, kinsa nagsilbing legal counsel ni kanhi Bulacan 1st District Engineering Asst. Chief Brice Hernandez, iya nang gisusi ang pipila ka mga sensitibong dokumento nga gihuptan sa iyang kliyente nga adunay sulod nga impormasyon mahitungod sa halapad nga network sa kurapsyon sa mga flood control projects sa probinsiya.
Apil na niini ang mga ngalan sa unom ka mga senador, upat niini anaa karon sa katungdanan o incumbent, samtang duha ang wala na sa serbisyo.
Nahisgotan ang mga ngalan nila ni Sen. Jingoy Estrada ug Senador Joel Villanueva na sa miaging mga pagdungog sa Senado bahin sa flood control scandal. Hinuon, sa testimonya ni kanhi District Engineer Henry Alcantara, nahisgutan usab ang ngalan ni kanhi Senador Ramon ‘Bong’ Revilla.
Sa bahin sa mga kongresista, gawas kang Rep. Zaldy Co ug uban pa nga nauna nang gihinganlan, aduna pay ubay-ubay nga wala gibutyag apan pulos gilakip sa mga dokumento nga gihuptan ni Hernandez.
Ang maong mga dokumento, sumala ni Atty. Fortun, isumite sa Independent Commission on Infrastructure ug sa Senado, aron magsilbi nga ebidensya sa lawom nga imbestigasyon ug sa katapusan pagpasaka sa mga kaso.
Niinsistir ang abogado, nga kining tanan anaa lang sa usa ka distrito sa Bulacan ubos sa buhatan ni Hernandez ug wala pay labot ang mga flood control projects sa tibuok nasod nga posibleng nakabenepisyo usab sa ubang mga magbabalaod.
Base sa mga dokumento nga gihuptan ni Hernandez, ang maong mga magbabalaod pulos nakabenepisyo sa kickback system nga nahitabo sa maong distrito.
Photo courtesy to:Abogado
