Miabot na sa 17 ang ihap sa nangamatay sa Taiwan ug China gumikan sa Bagyong Ragasa, human sa lapad nga pagbaha, kadaot, ug pagbakwit sa minilyon ka mga residente sa rehiyon.
Sumala sa mga taho gikan sa mga awtoridad sa China, kapin sa 2 milyon nga mga tawo ang napugos sa pagbakwit sa ilang mga balay, labina sa mga probinsya sa habagatang China, tungod sa hulga sa kusog nga ulan ug pag-awas sa mga suba ug lanaw.
Sa Taishan County, lalawigan sa Guangdong, ang labing kusog nga huros sa hangin miabot sa 241 kilometros matag oras, hinungdan sa pagpataas sa lebel sa alerto sa daghang mga lugar.
Ubay-ubay usab nga mga tawo ang gikataho nga na-missing human ang tubig nag-awas sa mga linaw ug suba, ilabina sa ubos nga mga dapit.
Daghang mga residente ang napugos sa pagsaka sa mga atop sa ilang mga balay aron makalingkawas sa kusog nga pagtaas sa tubig, samtang nagpadayon ang mga operasyon sa pagluwas sa lokal nga mga awtoridad.
via: BBC
