Naimbento sa Australia ang usa ka talagsaong teknolohiya nga naghiusa sa utok sa tawo ug kompyuter pinaagi sa biological computing. Ang biotech nga kompanya nga Cortical Labs mao ang naglansad sa CL1, ang unang biological computer sa kalibutan nga mahimong ma-deploy ug mahimong gamiton sama sa tradisyonal nga makina.
Imbis silicon chips lang, gigamit usab niini ang mga neuron cells gikan sa stem cells aron mas mahimong paspas ug mas “intelligent” kay sa kasagaran nga AI system.
Niadtong 2022, nakig-alayon ang Cortical Labs sa Monash University ug nakahimo og laboratory-based neural computer nga nakadula og video game nga Pong sulod lang sa lima ka minuto. Apan limitado ra kini sa laboratoryo, busa gihimo nila ang mas portable ug praktikal nga bersyon nga gitawag og CL1. Ang mga neuron sa makina gibutang sa espesyal nga sudlanan nga nagsilbi og life-support system, nagkontrol sa temperatura ug gas exchange aron mapadayon ang kinabuhi sa brain cells.
Sumala sa kompanya, dako kini og kapuslanan sa pagpalawom sa kahibalo sa utok ug sa pagtuon sa mga sakit nga dili masulbad pinaagi lang sa animal testing. Apan mahal ang teknolohiya nga moabot kini og $35,000 (labaw pa sa P2 milyon) matag unit. Aron mas dali nga ma-access, nagplano usab ang Cortical Labs og cloud-based nga bersyon nga mahimong gamiton sa mga researcher sa tibuok kalibutan.
Bisan pa, nagdala kini og daghang pangutana sa etikal ug moral nga aspeto. Ang paggamit sa mga selula sa utok sa tawo isip bahin sa computer system nagbutang og limitasyon ug kontrobersiya hangtod asa man kutob ang angay nga paghiusa sa biology ug teknolohiya?
Photo Courtesy: jobtorob.com
