“Enough is enough.” Panahon na para managot ang mga corrupt,” mao kini ang habig ni Mamamayang Liberal partylist Rep. Leila de Lima. Gibuhat ni De Lima ang maong pamahayag atol sa gihimong rally kagahapon, Setyembre 21, 2025.
Apil ang maong mambabalaod sa nanguna sa pagpanghimakak sa giingong mga anomaloso ug korapsyon sa mga proyekto sa gobyerno.
Ingon usa ka House Deputy Minority Leader, hugot niyang gisaway ang mga mambabalaod nga daw wala manalipod sa interes sa katawhan.
“Nasaan na nga ba ang ibang mambabatas? Bakit wala sila rito? Siguro busy silang maghanap ng mga dahilan para makalusot sa kanilang mga katiwalian,”matud ni de Lima.
Gisaway usab ni De Lima ang mga opisyal nga nakapahimulos sa mga “kickback” ug pagpanglimbong nga nagdala sa grabe nga kalisod sa mga Pilipino, labi na panahon sa kusog nga pagbaha.
Iyang gipahinumdoman nga dili kinahanglan mahupay ang kasuko sa katawhan bisan pa man kung mohunong na ang baha, ug nanawagan siya sa padayon nga paglihok aron manubag sa hustisya ang mga nalambigit sa korapsyon.
Gitumbok usab ni De Lima si VP Sara Duterte, nga matud pa niya angay nga manubag sa mga anomalya ug pangurakot.
Ingon nga solusyon, nanawagan siya sa Kongreso nga ipasa ang balaod sa paghimo sa “Independent Commission Against Infrastructure Corruption” aron seryosohon ang grabe nga pangurakot sa mga proyekto sa gobyerno.
Gihagit usab ni De Lima si Pangulong Marcos Jr. nga i-certify isip urgent ang House Bill No. 4453 nga naglatid sa pagtukod sa maong komisyon.
Photo Courtesy: CyberGuardiansPH
