Kusganong gipanghimakak ni Senador Joel Villanueva nga duna siyay kalambigitan sa giingong anomaliya sa P600-million nga pundo alang sa flood control projects sa probinsiya sa Bulacan, taliwala sa mga pasangil nga nakadawat siya og porsiyento gikan sa maong pundo.
Si Villanueva niinsister nga dili siya angayang himoong “punching bag” sa matag higayon nga adunay isyu o anomaliya nga motumaw may kalabotan sa mga proyektong imprastraktura sa iyang lungsod.
Matod sa senador, wa siyay labot sa giingong pagsal-ot sa P600 milyones nga unprogrammed funds sa 2023 national budget.
Kini ang reaksyon sa senador nunot sa kumpirmasyon ni Senate President Pro Tempore Panfilo Lacson kalabot sa presensiya sa maong pundo nga giingong gitagana alang sa flood control projects sa Bulacan, kung asa adunay pito ngadto sa walo ka mga proyekto nga adunay gahin nga P75 milyones matag usa, nga mokabat sa kinatibuk-ang P600 milyones.
Unang nitumaw ang ngan ni Villanueva human gibutyag ni kanhi assistant district engineer sa Department of Public Works and Highways (DPWH) Brice Hernandez nga ang senador giingong nangayo og 30 porsiyento sa kantidad sa maong pundo—alegasyon nga hugot usab nga gihimakak sa magbabalaod.
via: Senate of the Philippines
