Naghimo og bag-ong kasaysayan sa kalibotan sa boksing si Terence Crawford human niyang mapildi si Canelo Alvarez pinaagi sa unanimous decision aron masakmit ang super middleweight title, atubangan sa 70,482 ka mga manan-away sa Allegiant Stadium.
Si Crawford (42-0, 31 KOs) mao ang unang lalaking boksingero nga nakab-ot ang tulo ka unified titles sa lahi-laing dibisyon. Duha ka hurado ang miskor sa 115-113 pabor kaniya, samtang ang usa pa naghatag og 116-112. Nahimong emosyonal si Crawford nga miluhod ug midangoyngoy sa ring sa wala pa gibutyag ang iyang kadaugan.
Bisan pa man nga halos tanan sa crowd mga suporter ni Canelo, nadungog gihapon ang kusog nga singgit pangalan ni Crawford sa mga fans sa katapusang mga rounds, timaan sa iyang nakuhang respeto.
Kini mao ang unang kapildihan ni Canelo (63-3-2, 39 KOs) sukad sa iyang kapildihan batok ni Dmitrii Bivol niadtong Mayo 2022.
Ang duwa mao usab ang unang boxing event nga gihimo sa Allegiant Stadium, ug mibungkag sa karaang attendance record sa Las Vegas nga 29,214 atol sa dula ni Holmes vs. Cooney niadtong 1982. Kini usab ang labing dako nga crowd sa bisan unsang sporting event nga nahitabo sa maong stadium, lapas sa 63,969 nga nakarekord sa 2024 college football season opener.
Photo courtesy: The New York Times
