Patay diha-diha dayon ang duha ka mag-uyab nga sakay sa motorsiklo human mibangga sa likod sa truck didto sa Sayre Highway, Purok 7 Barangay Mailag, Valencia City alas 4:20 sa buntag kagahapon Setyembre 14, 2025.
Ang mga biktima nailhan nga sila si alyas nga “Win-win,” 20 anyos, lumolupyo sa Barangay Nabag-o, sa maong Syudad, nga maoy nagmaneho sa motor, kauban iyang angkas nga si “Kimmy,” 20 anyos, taga-South Cotabato.
Base sa inisyal nga imbestigasyon, nagbiyahe ang duha paingon sa Malaybalay City ug nagsunod sa usa ka truck nga nagdagan sa outer lane dihang pag-abot sa maong lugar, kalit lang mibangga ug napasok ang motor sa likod nga bahin sa truck.
Tungod sa kakusog sa impact, nakaangkon ug grabing samad sa kalawasan ang duha ka mga biktima, ug daling gidala sa Valencia City Polymedic Hospital apan gideklarar nga dead on arrival sa doctor nga nag-atiman kanila.
Napamatud-an usab nga walay gamit nga helmet ang duha atol sa insidente. Ang motorsiklo ug ang trak lakip ang drayber niini gidala na sa Valencia City Police Station alang sa tukmang disposisyon samtang nagpadayon ang makuting imbestigasyon.
via: CDRRMO VALENCIA
