Nagpahayag og suporta ug baruganan ang Estados Unidos sa Pilipinas human gibutyag sa China ang ilang plano nga pagtukod og nature reserve sa bahin sa Scarborough Shoal nga kabahin sa West Philippine Sea.
Sa usa ka pamahayag, gitawag ni US Secretary of State Marco Rubio nga ‘destabilizing’ ang mga lakang ug plano sa China.
Matud niya, usa kini ka hulga sa regional stability sa Indo-Pacific region, diin matud pa niya, kini usa ka lakang aron mapaduol ang nasud sa padayon nga pag-angkon sa mga teritoryo nga sakop sa Pilipinas.
Gipunto usab ni Rubio nga kini usa ka pugos nga pamaagi sa China aron mas palig-onon pa ang ilang ilegal nga presensya sa WPS. Kining mga lakang sa China nagpalisod sa mga mangingisda sa pagtuman sa ilang panginabuhian tungod sa posibleng hulga niini sa ilang kaluwasan.
Samtang, una niini, gikondena sa Department of Foreign Affairs (DFA) ang lakang ug gitawag kini nga ‘illegitimate’ ug ‘unlawful’.
Nanawagan na usab ang ahensya ngadto sa China nga hunungon ang mga kalihokan ug respetuhon ang soberenya ug hurisdiksyon sa Pilipinas sa mga teritoryo niini.
Photo courtesy: Rappler
