Misulod ang mga drone sa Russia sa kahanginan sa Poland sayo sa Miyerkules, Setyembre 10, nga nag-aghat sa gilayon nga pagkaaktibo sa ilang air defence system ug tubag sa militar gikan sa mga kaalyado niini sa North Atlantic Treaty Organization (NATO).
Sumala sa mga taho, daghang mga drone sa Russia ang gikataho nga nahagsa human ma-intercept sa mga depensa sa Poland. Agig tubag, gipakatap dayon sa NATO ang mga ayroplanong militar, lakip ang mga fighter jets sa US, aron magpahigayon og mga patrol sa kahanginan ug mapugngan ang bisan unsang dugang nga paglapas sa kahanginan sa nasud.
Sa usa ka pamahayag, gikumpirma sa Punong Ministro sa Poland nga si Donald Tusk ang insidente ug giingon nga adunay “daghang mga paglapas” sa ilang airspace sa Russia.
Sa pikas bahin kusganong gipanghimakak sa Russia nga aduna silay intensiyon nga atakehon ang Poland, nunot sa insidente diin 19 ka mga drone sa maong nasud ang gikatahong gipukan human makasulod sa airspace sa Warsaw sa Poland atol sa overnight attacks.
Padayon pa nga giimbestigahan sa Poland ang insidente, samtang ang militar sa nasud nagpabilin nga alerto sa bisan unsang posible nga hulga.
via: JACQUELINE/REUTERS
