Mas gipahugtan karon sa Iligan City Police Office (ICPO) ang ilang kampanya batok sa mga iligal nga armas, ilabi na nga nagkaduol na ang Kapistahan ni Sr. San Miguel ug ang gikahinaman nga Dyandi Festival.
Gipakusgan ang mga operasyon sa kapulisan aron masiguro nga malinawon, hapsay, ug luwas ang tanang kalihokan sa syudad sulod sa kasaulogan.
Giawhag usab ni Police Major Zandrex Panolong,-Police Information Officer sa ICPO, ang katawhan nga likayan ang pagdala og armas kung walay klaro ug kumpletong papeles.
Gidugang pa niya nga kinahanglan nga responsable usab ang mga nanag-iya ug armas aron mapugngan ang hulga sa katalagman, malikayan ang kagubot, ug masiguro nga ang Dyandi Festival magpadayon nga malinawon, masadya, ug puno sa kultura ug kalipay.
Sa kooperasyon sa katawhan ug hugot nga pagbantay sa kapulisan, naglaum ang ICPO nga karong tuiga, pinakaluwas ug pinaka-nindot nga Dyandi Festival ang masinatian sa mga Iliganon.
