Gipasiugda sa National Security Council (NSC) nga ang mga lakang sa Pilipinas sa West Philippine Sea (WPS) dili angay isipon nga hulga sa kalinaw ug seguridad sa rehiyon.
Kini human sa hulga sa China nga adunay “consequences” matud pa ang mga lakang sa Pilipinas sa WPS.
Sumala ni National Security Adviser Eduardo Año, ang Pilipinas wala malambigit sa pagpanghadlok, harassment, o agresyon sa kadagatan.
Hinuon, gipakita sa Philippine Navy, Coast Guard, ug Bureau of Fisheries and Aquatic Resources (BFAR) ang malinawon apan lig-on nga baruganan alang sa katungod sa nasud ug dili kita ang tinubdan sa kagubot.
Gihisgutan usab sa opisyal ang usa ka survey nga nagpakita nga 76% sa mga Pilipino mosuporta sa pagpanalipod sa katungod sa dagat sa nasud sa WPS, 85% ang walay pagsalig sa China ug 74% ang nagtan-aw sa Beijing ingon man pinakadakong hulga sa Pilipinas tungod sa agresibong lihok niini sa WPS ug sa mga kriminal nga isyu nga nalambigit ang pipila ka Chinese nationals.
Gihingusgan ni Año nga magpabiling lig-on ang gobyerno sa pagpanalipod sa soberanya pinasikad sa international law sama sa United Nations Convention on the Law of the Sea (UNCLOS) ug sa Philippine Maritime Zones Act nga naglatid sa mga utlanan sa dagat.
Padayon usab, matod pa niya, ang pagpabakod sa depensa ug maritime capabilities sa nasud, apil na ang mga alyansa sa mga kaalyadong nasud.
Giklaro usab ni Año nga ang mga joint patrols ug military exercises, sama sa bag-ohay lang nga Exercise ALON 2025, kabahin sa regular nga kooperasyon uban sa mga kaalyado aron masiguro ang kagawasan ug kaayohan sa Indo-Pacific.
Gipunting sa NSA nga klaro ang tingog sa katawhan nga ang pagpanalipod sa West Philippine Sea dili lang polisiya sa gobyerno kondili usa kini ka nasudnong tumong.
Photo Courtesy to:National Security Council of the Philippines
