Gitakda magtukod ug labing dako nga weightlifting academy sa nasod ang Philippine Sports Commission (PSC), sa pakigtambayayong sa Department of Education (DepEd) ug Olympic gold medalist nga si Hidilyn Diaz, subay sa direktiba ni Presidente Ferdinand Marcos Jr.
Miingon si DepEd Secretary Sonny Angara sa bag-ohay nga tigom nga adunay 300 ka mga tunghaan sa tibuok nasod nga adunay specialized sports curriculum, busa ang programa nagpunting sa weightlifting isip ilang backbone.
Si Hidilyn Diaz, kinsa nakatukod na og kaugalingong weightlifting academy sa Jala-Jala, Rizal human sa iyang kadaugan sa Olympic niadtong 2021, magsilbi nga inspirasyon ug aktibong kauban sa programa.
Mipadayag usab ang Department of Budget and Management (DBM) pinangulohan ni Secretary Amenah Pangandaman sa hingpit nga suporta kinsa nagkanayon nga ang gobyerno mogahin og P180 milyones alang sa proyekto.
Human ma-finalize ang listahan sa mga partisipante nga tunghaan, ang PSC, DepEd, ug Diaz pormal nga mopirma sa kasabutan.
Ang programa gilauman nga ilunsad pinaagi sa usa ka coaches’ summit sa dili pa ang opisyal nga pag-apod-apod sa mga ekipo.
via: PSC
