Gianunsyo ni Indonesian President Prabowo Subianto niadtong domingo, Agosto 31, nga nagkasabot ang mga partido politikal sa nasud nga bawion ang pipila ka benepisyo ug pribilehiyo sa mga miyembro sa parliyamento, human sa lapad nga protesta nga miresulta sa kamatayon sa lima ka tawo, nga giisip nga pinaka grabe sulod sa pipila ka dekada.
Mahinumduman nga nagsugod ang protesta niadtong lunes batok sa giingong sobra nga sweldo ug allowance sa pabalay sa mga magbabalaod.
Misamot ang tensyon niadtong biyernes human napatay ang usa ka motorcycle ride-hailing driver taliwala sa protesta sa kamot sa mga pulis. Gisunog ug gipangawat ang pipila ka balay sa mga opisyal ug mga building sa gobyerno, nga nakahatag og grabeng kabalaka sa publiko ug nakapahinay sa stock market ug sa kantidad sa kuwarta sa indonesia.
Matud ni Prabowo, apil sa bawion ang dako nga allowance sa mga magbabalaod ug ang mga biyahe sa laing nasud. Dungan niini, iyang gimanduan ang militar ug pulisya nga hugot nga gukdon ang mga nalambigit sa pagpangdaot, pagpangawat, ug kagubot. Gitawag pa niya ang pipila ka lihok nga nagsimbolo sa terorismo ug pagluib sa nasud.
Gikansela usab ni Prabowo ang iyang gikatakdang pagbisita sa china aron tutukan ang sitwasyon. Makita usab ang paggamit sa mga opisyal og ordinaryo nga plaka sa sakyanan usa ka lakang aron sa paglikay sa kasuko sa publiko.
Samtang, nagpabilin nga dili klaro kung kinsa ang anaa sa likod sa lapad nga pagpangdaot ug kapintasan nga hinungdan sa mga protesta. Sumala sa mga lider sa mga estudyante, dili pa igo ang pagtangtang sa benepisyo sa mga magbabalaod, diin ilang giingon nga posibleng masundan pa ang mga protesta.
Photo courtesy:Willy Kurniawan/Reuters
