Gi-report sa lokal nga panggamhanan sa Quezon City nga gibaha ang 36 sa 142 ka barangay sa siyudad niadtong Sabado, Agosto 30, 2025 human makasinati og “phenomenal” nga pag-ulan nga mitungha og 141 millimeters sulod lamang sa usa ka oras.
Duha ka kalsada ang nakasinati sa grabe nga baha, lakip na ang Tabing Ilog St. sa Barangay Apolonio Samson ug Daang Tubo sa Barangay UP Campus, nga lampas-tawo ang tubig.
Matod sa Quezon City government, wala nakaya sa drainage system ang kusog ug paspas nga pagbundak sa ulan, hinungdan nga bisan ang mga lugar nga dili kasagaran mabahaan, naapektuhan gihapon.
Ang kadaghanon sa ulan mas labaw pa sa natala panahon sa Typhoon Ondoy niadtong 2009. Sumala sa disaster scientist nga si Mahar Lagmay, ang maong pag-ulan maisip nga “extreme” tungod kay milapas kini sa 60 mm matag oras.
Dugang pa sa LGU, nakatabang ang padayong declogging operations aron paspas nga moubos ang tubig sa kadalanan.
Gipasabot usab sa lokal nga pamunuan ang pagpatuman sa Drainage Master Plan (DMP) isip dugay nga solusyon batok sa pagbaha.
Samtang, daghang netizens ang nagpahayag og pagkabalaka ug pagbasol sa epekto sa mga flood control projects nga gihimo sa panggamhanan.
via: Jhon Flores
