Mibalos og air strikes ang Israel sa kapital sa Yemen nga mao ang Sanaa human mipabusikad og missiles ang Houthi rebels padulong ngdato sa Israel.
Base sa tigpamaba sa Houthi Health Ministry, ang air strike sa Israel mikalas og unom ka tawo ug nakaangol sa 86 pa ka indibidwal.
Ang air strikes sa Israel mao ang labing bag-ong hitabo sa kapin usa ka tuig nga panagbinayloay og pag-atake tali sa Israel ug militante nga Houthi sa Yemen isip kabahin sa spillover sa giyera sa Gaza.
Sumala sa Israeli Defense Forces (IDF), apil sa ilang target mao ang usa ka military compound diin nahimutang ang presidential palace, duha ka power plants ug usa ka fuel storage site.
Gipasabot usab sa Israeli military nga gihimo nila ang strikes isip tubag sa padayon nga pag-atake sa rehimen sa teroristang Houthi batok sa estado sa Israel ug sa ilang mga sibilyang katawhan, diin lakip sa gipabuto sa rebelde nga grupo mao ang surface-to-surface missiles ug unmanned aerial vehicles (UAVs) padulong sa teritoryo sa Israel sa miaging mga adlaw.
Gikumpirma na daan sa Houthis niadtong milabay nga semana nga sila mipabusikad og ballistic missiles padulong sa Israel sa ilang pinakabag-ong pag-atake isip pagsuporta sa mga Palestino sa Gaza.
Sumala sa opisyal sa Israeli Air Force, posibleng adunay sulod nga pipila ka sub-munitions ang mga missiles nga tuyo ipabuto sa dihang nakalock na ang target. Kini usab ang unang higayon nga naglusad ang Houthis og ingon niini nga klase sa missile gikan sa Yemen.
Kahinumdoman, nagsugod ang mga pag-atake sa Houthis sa mga barko nga miagi sa Red Sea isip pakig-ambit sa ilang alyadong Hamas sa Gaza nga padayon nga adunay panagbangi batok sa Israel.
Photo courtesy to:PSB News
