Narekober sa mga imbestigador gikan sa Guindulungan police ang pipila ka basyo sa bala sa lugar sa van nga giambush sa Barangay Bagan, Guindulungan, Maguindanao gabie adlaw’ng Lunes, Agosto 25, 2025.
Anaa na ang van karon sa kustodiya sa Datu Saudi police kung asa duha ang patay, usa kanila dead-on-the-spot samtang ang usa dead-on-arrival sa ospital human gipamusil ang ilang gisakyan nga van.
Sumala ni Lieutenant Colonel Jopy Ventura, tigpamaba sa Police Regional Office–Bangsamoro Autonomous Region (PRO BAR), ang van adunay 18 ka pasahero ug gabiyahe sa national highway padulong sa Datu Saudi Ampatuan, Maguindanao sa dihang kalit lang kini gipamusil sa wala mailhing mga indibidwal.
Bisan pa niini, nakapadayon gihapon ug maneho ang drayber hangtod nakaabot sila sa Datu Saudi Ampatuan Municipal Police Station.
Daling mitubag ang kapulisan sa Datu Saudi Police Station ug gidala ang pito ka samdan sa Maguindanao Provincial Hospital.
Usa sa mga biktima nga grabe ang samad hinungdan nga namatay sa ospital, samtang ang usa patay na gikan mismo sa van.
Swerteng wala nasamdan walo ka mga pasahero sa van. Sa report sa mga awtoridad, nakasibat ang mga suspetsado sakay sa usa ka itom nga minivan nga walay plaka.
Padayon ang lawom nga imbestigasyon sa Guindulungan police aron mailhan ang mga suspek ug masuta ang motibo sa pag-atake.
Photo courtesy to: Joeyboy Sandiego
