Mibarog ang Cagayan de Oro City Rice and Corn Retailers Association ug United Market Vendors Association nga dili garantiya nga moubos ang presyo sa bugas kon ipatuman na ang 60 ka adlaw nga import ban sa gobyerno batok sa pagsulod sa imported premium rice sa Pilipinas.
Sumala ni Engr. Franklin Dagcuta, ang presidente sa maong asosasyon, nga ang giplanong import ban posible pa nga mopataas sa presyo sa bugas imbes nga moubos.
Gipasabot niini nga sayo ra kaayo ang pag-anunsyo sa import ban hinungdan nga adunay higayon ang mga retailers nga mamarkahan ang ilang imbentaryo bisan pa nga kini ilang napalit sa mas ubos nga presyo pipila ka bulan ang milabay.
Kinahanglan usab nga masiguro una sa gobyerno nga adunay igo nga buffer stock sa suplay sa bugas sa wala pa gibawal ang importasyon sa bugas sa nasud.
Samtang, kahinumdoman nga sa gihimong pagdungog sa Senado sa Committee on Agriculture, Food and Agrarian Reform nga gipangulohan ni Sen. Francis ‘Kiko’ Pangilinan, gipahayag ni Department of Agriculture (DA) Secretary Francisco Tiu Laurel Jr. nga ipatuman ang 60 ka adlaw nga import ban sa unang adlaw sa Septiyembre.
Gilauman nga pinaagi niini matabangan ang mga lokal nga mag-uuma nga mabaligya ang ilang mga humay.
