Miuyon sa pinakabag-ong sugyot sa kalinaw ang militanteng grupo nga Hamas nga gipresentar sa mga tigpataliwala sa rehiyon gikan sa Egypt ug Qatar.
Sumala sa mga taho karong semanaha giingong ang sugyot nga gisuportahan usab sa Estados Unidos pinaagi sa special envoy nga si Steve Witkoff, unang gipresentar sa Hamas kaniadtong Hunyo ug gibase sa duha ka yugto nga kasabutan aron makunhuran ang gubot sa Gaza.
Ubos sa kasabutan, gitakda sa Hamas nga buhian ang katunga sa nahabilin nga 50 ka mga hostage sa Israel, lakip ang 20 nga nakumpirma nga buhi, isip bahin sa unang hugna sa kasabutan.
Buhaton kini sa duha ka batch, kauban ang 60 ka adlaw nga ceasefire, tungod kay ang mga panaghisgot gilauman nga mouswag padulong sa usa ka permanenteng lakang.
Naglaom ang mga tigpataliwala gikan sa Egypt ug Qatar nga ang Israel motubag usab nga positibo sa maong lakang, bisan pa man nga ang Israel nagpabilin nga lig-on sa iyang posisyon nga mouyon lang kini sa usa ka kasabutan kung buhian ang tanan nga mga binilanggo.
via: Reuters
