Laing mahinungdanong kadaugan ang nasakmit sa kasundalohan human sa ikaduhang engkwentro batok sa mga salin sa mga teroristang komunista atol sa gitutokan nga mga operasyong militar sa paggukod sa kaaway didto sa Barangay Guihean, Impasug-ong, Bukidnon niadtong Agosto 17, 2025.
Kini nunot sa nahitabong engkwentro niadtong Agosto 13, diin gigukod sa mga tropa ang miikyas nga mga armadong elemento nga miresulta sa pag-neutralize sa duha (2) ka miyembro sa CPP-NPA Terrorists (CNTs) nga usa ka wala mailhing lalaki ug babaye.
Dugang pa, narekober sa mga tropa ang lima (5) ka high-powered firearms, nagkalain-laing subersibong dokumento ug mga materyales sa gubat, kini nga kalampusan sa gobyerno nakabalda sa ilang kapabilidad sa pagpadayon sa ilang armadong pakigbisog.
Gidayeg ni 403rd Infantry “Peacemaker” Brigade, pinangulohan ni Brigadier General Seigfred C. Tubalado PA ang kaisog ug disiplina sa tropa apan gipahinumdoman usab sila nga higpit nga tumanon ang operational safety measures ug rules of engagement atol sa combat operations.
Hisayran nga ang tropa naningkamot sa pagrekober sa nahisgutang mga patayng lawas aron mahatod sa ilang mga pamilya ug mahatagan sa tukmang tabang sa paglubong.
Gipasalig ni BGen. Tubalado ngadto sa nahabilin nga mga CNT nga andam ang gobyerno sa pagsagop sa mga mopili sa pag-surrender.
via: 403rd Infantry “Peacemaker” Brigade PA
