MALAYBALAY CITY- Patay nga nakaplagan ang usa ka lalaki pasado alas 4:00 sa hapon, Agosto 13, 2025, sa Purok 5, Barangay San Martin, Malaybalay City Bukidnon.
Giila ni Christopher Puntanar sa pagpakisayod sa Juander Radyo Malaybalay, ang biktima nga si Felix Lomonda Cabañog alyas “Ete”, kapin 50 anyos ug residente sa maong lugar.
Sumala pa sa impormasyon, katapusan nakita ang biktima niadtong Lunes aron mangumbira sa usa ka kasal, apan wala na kini nakauli sa ilang panimalay.
Dugang pa sa Barangay Public Safety Officer (BPSO) chief mahiligon mag-inom ang biktima, apan wala kini record nga magpasamok o mangitag away kon mahubog, tungod kay buotan kini nga tawo busa natingala nalang ang mga opisyal sa barangay ug BPSO human sila nakadawat og report nga adunay patay nga lawas nga nagbuy-od daplin sa sementadong dalan, ug dayon nanawag sa kapulisan aron masuta ang panghitabo.
Base sa inisyal nga imbestigasyon sa kapulisan, walay nakitang foul play sa kamatayon sa biktima.
Nagpahimangno karon ang hepe sa BPSO ngadto sa publiko nga likayan ang sobra nga pag-inom ilabina sa gabii aron malikayan ang susamang insidente.
via :Malaybalay City Police Station
