PAGADIAN CITY- Mag-atubang sa kasong paglapas sa Comprehensive Dangerous Drugs Act of 2002 (RA 9165) ang usa ka drug suspect nga nadakpan sa gilusad nga drug buy bust operation sa may Purok Orchids, Brgy San Pedro, Dumingag, Zamboanga del Sur, kagahapon, Agosto 5, 2025.
Gilusad ang hiniusang operasyon sa pagpanguna sa Dumingag Municipal Police Station ug 902nd Regional Mobile Force Battalion 9 (RMFB9) nga miresulta sa pagkasikop ni alyas Badi, 40 anyos, lalaki, butcher, nga residente sa maong lugar.
Nabawi sa otoridad gikan sa dinakpan ang tulo ka pakete sa gituohang shabu, usa ka P500 bill nga gigamit isip buy-bust money, ug usa ka Android phone.
Ang tanang nakuha nga mga ebidensya giturn-over ngadto sa Zamboanga del Sur Provincial Forensic Unit, Camp Abelon, Pagadian alang sa laboratory examination.
Samtang ang suspetsado nakakustudiya na sa Dumingag Municipal Police Station alang sa tukmang lakang.
Photo credits: ZSPPO
