PAGADIAN CITY- Patay ang driver ug pahinante sa usa ka trailer truck human kini mahulog sa pampang nga bahin sa may Purok 2, Maragang, Tigbao, Zamboanga del Sur, karong hapon, Agosto 4, 2025.
Ang maong trailer truck gimaneho sa usa ka Jonel Gumapac nga nagbyahe gikan sa lungsod sa Dumalinao paingon sa lungsod sa Bayog, Zamboanga del Sur.
Sakay sa trailer truck ang tulo ka indibidwal nga naglangkob sa pahinante ug ang duha ka indibidwal nga misakay sa pison nga karga usab sa maong truck.
Gikataho nga nawad-an ug brake ang trailer truck hinungdan na-lost control ang driver ug nahulog sa pampang nga bahin sa nahisgutan nga lugar nga naka-angkon ug grabeng danyos.
Dali nga miresponde ang mga personahe sa BFP Tigbao, MDRRMO Tigbao ug Tigbao MPS aron makuha ang mga biktima nga naipit sa maong sakyanan.
Gumikan sa kakusog sa impact duha ang gideklarang dead on the spot nga naglangkob sa pahinante ug driver, samtang luwas ra ang laing duha ka indibidwal nga nagsakay sa pison.
Daling gidala ang mga biktimang angol sa pinakaduol nga tambalanan aron madapatan ug dinalian nga medikasyon, samtang ang patayng lawas sa duha ka mga biktima gikarga sa MDRRMO Tigbao aron kini dad-on kon asa kini ipahimutang sa pamilya.
