MALAYBALAY CITY- Gi-rescue kagahapon Hulyo 23, 2025 sa Municipal Social Welfare and Development Office (MSWDO) sa pakig-alayon sa Pangantucan Municipal Police Station (MPS) ang duha ka menor de edad nga gikaingong nagtaban didto sa Barangay Poblacion sa nahisgutang lungsod.
Kini base sa gikataho nga impormasyon sa ginikanan sa batang babaye ngadto sa ahensya aron mabalik iyang anak nga 13 anyos pa lamang nga gitaban sa 17 anyos nga lalaki.
Gipaningkamotan sa duha ka ahensya ang plastar, luwas, ug legal nga pagrescue sa mga bata, uban ang tinud-anay nga tumong nga maprotektahan ang ilang katungod ug kaugmaon.
Pinaagi sa balaod, ginadili ang pagpuyo nga magkauban ang mga menor de edad, ilabina kung kini naglangkob og child marriage o sitwasyon nga makapahamtang og peligro sa ilang kinabuhi, edukasyon, ug kalinaw.
Ang Anti-Child Marriage Law (RA 11596) klaro nga nagdili sa bisan kinsa nga magpasiugda, motugot, o motabang sa pagpahigayon sa maong kahimtang.
Via: Mswdo – Pangantucan
