MALAYBALAY CITY- Dead on arrival ang back rider ug nakabsan usab sa kinabuhi ang driver sa motorsiklo human nabanggaan sa sakyanan alas 8:25 sa gabii niadtong nakalabay nga adlaw sa Purok 5, Barangay Cayaga, San Fernando, Bukidnon.
Ang motorsiklo nga nalambigit sa insidente walay plate number, gimaneho sa usa ka lalaki, anaa sa hustong edad, minyo, usa ka trabahador, ang back rider nga babaye, anaa sa hustong edad, biyuda pulos residente sa Purok 5, Barangay Matupe, San Fernando.
Samtang ang Isuzu Elf truck, kolor itom/yellow, adunay plate number KAO 2376, gipanag-iya sa usa ka babaye, anaa sa hustong edad, minyo, ug residente sa Purok 5, Barangay Cayaga, nga giparking daplin sa dalan niadtong higayona.
Gimaneho usab sa 60 anyos, lalaki, minyo, retiradong seaman, ug residente sa C20 Mount Catarman, St. Capistrano Complex Subdivision, Gusa, Cagayan de Oro City ang Ford Ranger Wildtrak, kolor orange, nga nibangga sa motor.
Base sa inisyal nga taho, nagbiyahe ang motorsiklo paingon sa silangan subay sa palugsong nga direksyon sa Barangay Kalagangan, samtang ang sakyanan nagbiyahe sa atbang nga direksyon dihang pag-abot sa lugar nahitaboan, giingong milahos sa pikas lane igo sa motorsiklo hinungdan nga nabangga kini sa giparking nga trak daplin sa dalan.
Anaa na karon sa Villanueva Funeral Home ang mga namatay alang sa funeral arrangement, samtang ang driver sa sakyanan boluntaryong mitahan ug kasamtangang gikustodiya sa kapolisan kinsa nagpaabot sa dugang imbestigasyon ug tukmang disposisyon sa kaso.
VIA: San Fernando Municipal Police Station
