MALAYBALAY CITY- Mokabat sa dul-an usa ka milyones ka pesos ang kantidad sa mga cellphone nga nadagit sa kawatan, walay labot ang 95 mil ka pesos nga kwarta, human gilungkab ang tindahan sa cellphone niadtong nakalabayng adlaw didto sa Cudal street, Barangay 2, Malaybalay City.
Gibutyag ni alyas “Edita” kinsa tindera ug kaliwat sa tag-iya sa maong tindahan atol sa pakighinabi sa Juander Radyo Malaybalay, gikaingon nga ang duha ka kawatan posibleng nasweto sa tindahan kay kahibalo nang daan kung asa nakabutang ang mga cellphone ug kwarta.
Sumala pa, gipanglugitan sa mga kawatan ang mga padlock sa roll-up dayon lambos sa bildo nga pultahan niini aron makasulod sa lugar, ug gipangputol usab ang mga wire nga connection sa CCTV.
Sa pagkakaron padayon pang gisusi sa kapulisan ang mga CCTV footages palibot sa maong lugar, samtang nagpahigayon sa lawom nga imbestigasyon aron sa pag-ila ug pagsikop sa mga suspetsado.
