MALAYBALAY CITY- Nahulog ang usa ka de-pasaherong multicab sa kanal, human gisungag sa nagsunod nga Toyota Van didto sa Sayre Highway, Purok-4, Barangay Kalasungay, Malaybalay City, pasado alas 7:15 sa buntag sa Hulyo 15, 2025.
Base sa inisyal nga imbestigasyon, ang Toyota Van gimaneho ni alyas Rey, 40 anyos, minyo, residente sa Indahag, Cagayan de Oro City, samtang ang multicab gimaneho ni alyas “Yves”, minyo ug taga Barangay Kalasungay ning syudad.
Sumala pa, nagdagan sa parehas nga direksyon paingon sa sentrong bahin sa siyudad ang duha ka sakyanan, apan pag-abot sa nahisgutang lugar, nabanggaan sa Van ang multicab nga maoy hinungdan sa pagkahulog niini sa kanal, tungod sa kusog nga impact, miresulta sa dakong kadaot sa duha ka sakyanan.
Gibutyag sa driver sa Van nga nakatagpilaw siya tungod sa kalayo sa biyahe gikan syudad sa Cagayan de Oro padulong unta didto sa Sultan Kudarat. Nasayran nga sa mga otoridad nga walay pasahero nga nasamdan sa maong insidente.
