MALAYBALAY CITY- Patay ang usa ka lalaki human gipusil sa wala pa mailhing suspetsado pasado alas 6:00 gabii Hulyo 13, 2025 didto sa Purok -1A, Batangan, Valencia City, Bukidnon.
Giila ang biktima nga si Casemer Sacayle Absin , hingkod ang pangedaron, minyo, mekaniko, taga Airborn Village, Mabuhay San Fernando Bukidnon.
Base sa imbestigasyon sa kapulisan samtang nagbaklay sa dalan ang biktima uban sa usa ka babae kalit kining giduol sa usa ka naka motor nga suspect ug gipusil sa makadaghang highayon gamit ang wala matino nga armas.
Nakaangkon ug ubay-ubayng samad pinusilan sa kalawasan ang biktima hinungdan sa iyang kamatayon samtang ang kauban niini nga babae, midagan gumikan sa kahadlok subay sa wala matino nga direksyon.
Sumala pa sa mga nakasaksi, posibleng kaila ra sa biktima ang suspetsado gumikan kay nag-estorya una sila ayha nahitabo ang pagpamusil-patay sa biktima.
Padayon pa lawom nga imbestigasyon sa kapolisan aron masuta ang motibo sa krimen ug masikop ang suspetsado. Sa pagkakaron aduna nay lead ang kapulisan sa suspetsado.
