Gisuportahan ni Bernard Hopkins si Pacquiao kinsa naka-relate sa sitwasyon ni People’s champ Manny Pacquiao, ingon man sa iyang edad.
Si Hopkins ang labing karaan nga boksidor nga nakadaog og world title human niya mailog ang light heavyweight belts sa edad nga 49 dihang iyang gipildi si Beibut Shumenov sa split decision niadtong Abril 2014.
Karon, makigsangka si Pacquiao kang WBC Welterweight Champion Mario Barrios karong Hulyo 19, sa MGM Grand Garden Arena sa Las Vegas, nga nagtinguha nga mahimong ikaduhang labing karaan nga boksidor sa kasaysayan sa boksing nga nakadaog og world title.
Bisan pa sa 46-anyos na si Pacquiao ug nibalik gikan sa upat ka tuig nga pagretiro, si Hopkins niingon nga duna pay kahigayonan si Pacquiao.
Matud pa ni Hopkins sa interbyu sa The Ring nga iyang gidayeg si Manny kay nasayod siya nga way laing makahimo niini gawas kang Pacquiao.
Hinuon, wa magtuo si Hopkins nga pildihon ni Pacquiao si Barrios pinaagi sa paghunong. Matod niya, mahimong modaog si Manny pinaagi sa desisyon, apan wala niya makita ang away nga motapos sa knockout.
Si Hopkins, kanhi dili malalis nga middleweight champion, naila sa iyang kataposang away niadtong Disyembre 2016, pipila ka semana sa wala pa ang iyang ika-52 nga adlawng natawhan, diin siya gipildi ni Joe Smith Jr.
