Nipadayag og kabalaka ang grupo sa mga mananagat nga Pambansang Lakas ng Kilusang Mamamalakaya ng Pilipinas (Pamalakaya) sa pag-us-os sa presyo sa tawilis (Sardinella tawilis) ngadto sa P100 matag kilo gikan sa kanhing presyo niini nga P250, taliwa sa taho nga ang mga patayng lawas sa mga missing sabungeros gilabay sa Taal Lake.
Matod sa Pamalakaya, nakadawat sila og report gikan sa pipila ka lungsod sa Cavite nga ang tawilis gibaligya sa minimum nga presyo nga P100 matag kilo. Ang grupo nagpahayag usab ug kabalaka sa mga mangingisda gikan sa mga lungsod sa palibot sa Taal Lake sa Batangas, nga nakasinati og kahadlok sa publiko bahin sa pagpalit sa isda gikan sa lugar.
Si Fernando Hicap, presidente sa Pamalakaya, niingon nga kung ingon niana ang presyo sa merkado sa tawilis, mokunhod gyud ang farm-gate price niini sa mga mangingisda sa Taal.
Bisan pa man nga ang Bureau of Fisheries and Aquatic Resources (BFAR) niingon nga luwas kan-on ang mga isda gikan sa Taal Lake, si Hicap niingon nga apektado gihapon ang presyo sa tawilis tungod sa mga taho nga dunay mga lawas nga gilabay sa lake.
Gihangyo ni Hicap ang Departamento sa Agrikultura ug BFAR sa paghatag ug tabang sa mga mangingisda pinaagi sa direktang pagpalit sa ilang mga produkto ug pagdasig sa publiko sa pagpadayon sa pagsuporta sa mga mangingisda sa Taal.
Ang mga technical divers gikan sa Philippine Coast Guard unang nagsugod sa retrieval operations sa Taal Lake niadtong Biyernes aron pangitaon ang mga lawas sa mga missing sabungero nga nawala sukad niadtong Abril 2021 hangtod Enero 2022.
