MALAYBALAY CITY- Misangpot sa pagkatumba human wala mabalanse ang karga sa usa ka Isuzu Elf nga sakyanan didto sa National Highway, Purok-2, Barangay Barongcot, Dangcagan, Bukidnon alas 4:50 sa hapon Hulyo 10, 2025.
Gimaneho ang sakyanan ni alyas “Bert” 26 anyos, kauban ang duha ka helper, residente sa Purok 14, TonganTongan, Valencia City, Bukidnon.
Sa imbestigasyon nasayran nga gikan nagbiyahe ang sakyanan gikan sa Norte paingon sa habagatan didto sa Kibawe, dihang wala nabalanse tungod wala naplastar ang karga nga mga oil container hinungdan nga natikwang sa tuong bahin sa dalan ang maong sakyanan.
Tungod niini, usa sa mga helper sa sakyanan, ang nakaangkon og samad sa iyang tuo nga bukton. Sa pagkakaron ang sakyanan nagpabilin pa sa lugar nahitaboan, samtang gihulat nga ipaayo kini sa tag-iya.
