Giawhag sa Police Regional Office 11 ang publiko nga diha-diha dayon nga motaho sa kapulisan kung adunay mamatikdan nga mga kadudahang tawo o mga wanted nga indibidwal nga nagpalibot o nagtago sa ilang komunidad.
Tumong sa maong panawagan nga matabangan ang kapulisan sa pagpangita ug pagdakop sa mga indibidwal nga adunay giatubang nga kaso ug pagdala kanila ngadto sa hustisya. Gidasig usab ang katawhan nga dili magduha duha sa pagtaho sa bisan unsang kadudahang kalihokan sa ilang palibot aron malikayan ang posibleng mga krimen ug mapadali ang aksyon sa kapulisan.
Samtang, gipahimangnoan ang publiko nga adunay katugbang nga legal nga silot ang bisan kinsang mapamatud-ang motabang sa pagtago o pagpanalipod sa mga wanted nga indibidwal. Ang maong lakang kabahin sa gipakusog nga Safer Cities Initiatives sa PRO 11 nga nagtumong sa pagpalig-on sa kalinaw, kahapsay ug seguridad sa tibuok Rehiyon 11.
Photo courtesy: PRO 11










