Gipalig-on sa Probinsiyal nga Panggamhanan sa Davao del Norte ang kahibalo ug kapasidad sa mga kawani niini pinaagi sa Demonstrating Gender Sensitivity Training nga gipahigayon niadtong milabay nga adlaw sa Pavilion, Davao del Norte Sports and Tourism Complex (DNSTC), Mankilam, Tagum City.
Gipasiugdahan kini sa Provincial Human Resource and Management Office (PHRMO) isip kabahin sa Strategic Competency-Based Human Resource Development Plan alang sa tuig 2025 hangtod 2027, sa pakigtambayayong sa Civil Service Commission (CSC) Region XI.
Gipangulohan nila Ms. Lourdes Amerkhan, Chief Human Resource Specialist sa CSC Regional Office XI, ug Director Ruby A. Española, Director II sa CSC Field Office-Davao del Norte, isip mga tigpamulong sa pagbansay.
Gipalawom nila ang pagsabot sa mga partisipante bahin sa pagrespeto, patas nga pagtagad sa kababayen-an ug kalalakin-an, gender equality ug social inclusion. Mokabat sa 50 ka kawani gikan sa nagkadaiyang departamento sa Kapitolyo ang miapil.
Matod ni PHRMO Head Edwin Palero, natino ang panginahanglan alang sa maong pagbansay pinaagi sa competency assessment. Gipasabot usab sa mga representante nila Governor Edwin I. Jubahib ug Vice Governor Clarice T. Jubahib ang kamahinungdanon sa padayong pagpalambo sa kahibalo ug kahanas sa mga kawani aron mahimong mas responsable ug epektibong mga alagad sa katawhan.
Photo Courtesy: Province of Davao del Norte










