Gipalig-on sa Dipolog City District Jail-Female Dormitory ang ilang programa sa rehabilitasyon ug pagbag-o sa kinabuhi sa mga Persons Deprived of Liberty o PDLs pinaagi sa Beads Making Livelihood Program.
Pinaagi niini, gihatagan og kahigayonan ang mga babayeng PDL nga mapalambo ang ilang mga kahanas, madiskobrehan ang ilang talento ug makahimo og mga handcrafted products isip pagpangandam sa mas produktibo nga kaugmaon.
Lakip sa ilang gihimong mga produkto ang mga beaded bag, krus, keychain, pitaka ug nagkalain-laing accessories nga gihimo uban sa ilang pagkamamugnaon.
Ang maong pasilidad ubos sa pagdumala ni Acting Jail Warden JINSP Prima T. Magallanes, padayon nga gipalambo ang mga kalihokan nga makatabang sa pagpalig-on sa kapasidad ug pag-andam sa mga PDL alang sa ilang pagbalik sa komunidad.
Giawhag usab ang publiko nga suportahan ang maong panginabuhian pinaagi sa pagpalit sa ilang mga produkto. Alang sa mga order ug pangutana, mahimong kontakon si SJO1 Raya A. de Leon o pinaagi sa Facebook Messenger account nga Ya Del.
Kini nga programa, gilauman nga dili lamang dugang panginabuhian ang mahatag sa mga PDL, kondili kahigayonan usab nga mapakita nga adunay bag-ong sinugdanan ug mas maayong kaugmaon human sa ilang proseso sa pagbag-o.
Photo courtesy: Dipolog City District Jail – Female Dormitory










