Arestado sa kapulisan ang usa ka 31 anyos nga lalaki human giingong nangawat og bag-ong anihong abokado sulod sa DOLE Stanfilco avocado plantation sa Sitio Le-ing, Barangay Acmonan, Tupi, South Cotabato, alas 5:45 sa buntag karong Nobyembre 17. Giila ang nadakpang suspek nga si Alyas Sam, 31 anyos, minyo ug laborer, residente sa Sitio Datalta, Barangay Acmonan, Tupi.
Nalambigit usab sa insidente sila si Alyas Datu, minyo ug laborer, residente sa Sitio Le-ing, nga naangol ug gidala sa Municipal Hospital alang sa medikal nga pagtagad, ug si Alyas Robert, minyo ug walay trabaho, nga padayon pang gipangita sa kapulisan.
Base sa report sa Tupi Municipal Police Station, narekober gikan sa mga suspek ang usa ka sako nga bag-ong harvest nga abokado nga motimbang og 20 kilos ug gibana-banang nagkantidad og 10 mil pesos.
Gikatahong personal nga ganansya ang motibo sa maong pagpangawat. Sa pagkakaron, giandam na sa kapulisan ang tukmang kaso batok sa nadakpang suspek pinaagi sa inquest proceedings sa Office of the Provincial Prosecutor sa Polomolok, South Cotabato.
Samtang padayon ang pagpangita sa usa pa ka suspek nga nakalingkawas.










