Duha ka lalaki ang gidakop sa mga sakop sa Police Station 7 atol sa checkpoint operation sa San Jose Road, Purok 16, Barangay Fatima, General Santos City, alas 10:27 sa gabii niadtong nakalabay nga adlaw.
Giila ang mga suspetsado nga sila si alyas Jak, 33 anyos, ug Alyas Boy, 45 anyos, nga nagsakay sa itom nga Honda RS125 nga walay plaka ug wala magsul-ob og helmet.
Sumala sa report, wala motuman ang drayber sa mando sa kapulisan nga mohunong ug mipadagan palayo sa checkpoint. Gigukod sila sa mga otoridad hangtod nga naabtan ug nadakpan. Narekober sa ilang pagpanag-iya ang duha ka sachet sa gituohang shabu nga may gibug-aton nga 0.45 gramos ug gibanabanang kantidad nga 3,060 pesos.
Gidala ang duha sa Police Station 7 alang sa dugang nga dokumentasyon ug pagproseso sa tukmang kaso. Ang gituohang shabu ipadala sa laboratoryo alang sa pagsusi, samtang posibleng mag-atubang sila og kaso ubos sa Article 151 sa Revised Penal Code ug Section 11 sa Republic Act 9165, depende sa resulta sa imbestigasyon.










