Nasikop sa kapulisan ang usa ka Top 10 Regional Most Wanted Person atol sa pagpatuman sa warrant of arrest sa Purok Mabinuligon, Barangay San Isidro, Koronadal City, South Cotabato, pasado alas dos kwarenta’y singko sa hapon niadtong Nobyembre 14, 2026.
Giila ang dinakpan sa alyas “Toto,” 33 anyos, usa ka trabahante ug residente sa maong lugar. Gipahigayon ang operasyon sa Koronadal City Police Station isip lead unit, kauban ang CIDG South Cotabato, Special Action Force ug South Cotabato Police Provincial Intelligence Unit.
Ang suspek giatubang ang kasong paglapas sa Sections 5 ug 11, Article II sa Republic Act 9165 o Comprehensive Dangerous Drugs Act of 2002. Walay piyansang girekomenda sa kaso ubos sa Section 5, samtang 200 mil pesos ang piyansa sa Section 11.
Samtang gipasalig ni PRO-12 Regional Director PBGEN Alan B. Manibog nga ipadayon ug palig-onon ang kampanya batok sa mga wanted person, ilabina kadtong nalambigit sa mga kaso nga may kalabotan sa ilegal nga droga.
Sa pagkakaron, anaa na sa kustodiya sa Koronadal City Police Station ang dinakpan samtang gihulat ang commitment order gikan sa korte.
Photo courtesy: PRO 12









