Nasakmit sa kapulisan ang mokabat sa 380 ka reams sa gituohang smuggled cigarettes ug nadakpan ang tulo ka lalaki atol sa anti-smuggling operation sa Purok Riverside Extension, Barangay Silway 7, Polomolok, South Cotabato, alas 10:20 sa buntag niadtong Nobyembre 15, 2026.
Giila ang mga dinakpan nga sila alyas Reden, 29 anyos; alyas Ador , 26 anyos; ug alyas Samz , 26 anyos, nga pawang residente sa Montay, Malabang, Lanao del Sur.
Narekober gikan sa ilang pagpanag-iya ang 380 ka reams sa New Berlin cigarettes nga walay tax stamp ug graphic health warning label, nga gisakay sa puti nga Suzuki multicab dropside.
Gibanabana nga mokabat sa P325, 158.40 ang kantidad sa nasakmit nga mga sigarilyo. Gipangunahan sa RID-12 Special Tracker Team Bravo ug Charlie, kauban ang Polomolok Municipal Police Station, ang operasyon pinaagi sa random checkpoint.
Gidala sa police station ang tulo ka suspek, mga sigarilyo ug multicab alang sa tukmang disposisyon. Ginaandam na sa kapulisan ang kasong paglapas sa Republic Act 10643 batok sa mga dinakpan.










