Laoman nga hisgutan ni Presidente Ferdinand Marcos Jr. ug US President Donald Trump sa ilang bilateral meeting karong Miyerkules, Nobyembre 18, ang 12.5 porsiyentong taripa nga gipahamtang sa Estados Unidos sa mga produktong gi-export gikan sa Pilipinas.
Sumala ni Trade Secretary Cristina Roque niadtong Lunes, Nobyembre 16, kabahin kini sa mga isyu nga ilang hisgutan, ilabina ang alegasyon nga kulang ang mga lakang sa Pilipinas aron mapugngan ang pagsulod sa mga imported nga produkto nga gihimo pinaagi sa pinugos nga pagpatrabaho o forced labor.
Gipatin-aw ni Roque nga nadawat na sa mga opisyal sa Amerika ang Joint Administrative Order (JAO) nga gipagawas sa gobyerno sa Pilipinas aron pugngan ang pagsulod sa maong mga produkto. Pinaagi sa maong mando, gitukod ang usa ka inter-agency committee nga pangulohan sa Department of Trade and Industry (DTI) aron modawat ug mag-imbestigar sa mga reklamo bahin sa mga imported nga produkto nga gidudahang gihimo pinaagi sa forced labor.
Gilaoman usab nga ipahayag sa Pilipinas ang tinguha nga mapaubos ang taripa aron mapalapdan ang eksportasyon sa nasud ngadto sa Amerika ug sa ubang merkado.
Gipahamtang sa Estados Unidos ang 12.5 porsiyentong taripa niadtong Hulyo 24 human sa imbestigasyon nga nag-ingon nga napakyas ang Pilipinas sa epektibong pagpatuman sa pagdili sa mga produktong gihimo pinaagi sa forced labor.
Sumala sa DTI, mokabat sa 34 porsiyento sa eksport sa Pilipinas ngadto sa Amerika, nga nagkantidad og mga 6.25 bilyong dolyares base sa datos sa 2025, ang maapektuhan sa mas taas nga taripa. Gilaom nga moabot si Trump sa Manila sa Nobyembre 17 ug makigtagbo kang Marcos sa Malacañang sa sunod nga adlaw sa dili pa mopadayon ngadto sa Shenzhen, China, alang sa Asia-Pacific Economic Cooperation summit.
Photo courtesy: PCO










